FUNGUO ZA UFALME WA MBINGUNI

KUIHUBIRI INJILI YA UFALME WA MUNGU Yesu Kristo alipoondoka hapa duniani aliacha agizo moja la msingi katika (Marko 16:15-18), “akawaambia, Enendeni ulimwenguni mwote, mkaihubiri Injili kwa kila kiumbe. Aaminiye na kubatizwa ataokoka; asiyeamini, atahukumiwa. Na ishara hizi zitafuatana na hao waaminio; kwa jina langu watatoa pepo; watasema kwa lugha mpya; watashika nyoka; hata wakinywa kitu cha kufisha, hakitawadhuru kabisa; wataweka mikono yao juu ya wagonjwa, nao watapata afya.” Kanisa la leo linahubiri matokeo ya hilo agizo, mfano- baraka (mafanikio), na karama za Roho Mtakatifu- mfano (uponyaji, miujiza na unabii), badala ya kuhubiri agizo lenyewe; halifahamu hiyo Injili (habari njema) tuliagizwa kuihubiri ni ipi? Matokeo yake limehubiri Injili nyingine na kujiweka chini ya laana (Wagalatia 1:6-9) ambayo baadhi ya matokeo yake ni kuharibika kwa afya ya akili na mwili (magonjwa), kuvunjika kwa mahusiano (ndoa) na hali ngumu ya kiuchumi (umaskini). Katika kitabu hiki utajifunza mambo ya msingi katika UFALME WA MUNGU, mfano, hiyo Injili (habari njema) tuliyoagizwa tuihubiri ni ipi? Wokovu, ujazo wa Roho Mtakatifu, uwepo wa Mungu, karama za Roho Mtakatifu, imani, mamlaka ya anayeamini, maombi, utumishi, mahusiano n.k. Kila mwana wa Mungu atakapoyafanyia kazi mapenzi ya Mungu makamilifu kama Yesu (Yohana 4:31-34, 6:35-40, 17:4), mtume Paulo (Waefeso 1:1), (Wagalatia 1:1), na mfalme Daudi (Matendo 13:36), ndipo kanisa litakuwa na nguvu kama kanisa la mwanzo lililokuwa chini ya mitume.